Egin zaitez bazkide

Gaztelu Beltza Xake Kluba (Beraun Bera Xake) elkartearen Estatutuak, Euskadiko Kirol Erakundeen Erregistroan CD0007753 zenbakiarekin inskribatuak.

I. KapituluaArau orokorrak

1. artikulua. GAZTELU BELTZA XAKE KLUBA irabazi-asmorik gabeko elkarte pribatua da, iraupen mugagabekoa, nortasun juridiko propioa eta jarduteko gaitasuna dituena, eta haren xedea honako kirol-modalitate hau(ek) sustatzea eta praktikatzea da:

• Modalitate nagusia: XAKEA
• XAKEA sustatzeko balio duten beste kirol-modalitate edo jarduera batzuk

Klubak, dagoen eskariaren eta bere giza baliabideen eta baliabide materialen arabera, desgaitasuna duten pertsonen kirola sustatuko du. Era berean, klubak emakumeen kirola bultzatuko du, kirol-diziplinak emakumeei irekitzea erraztuz.

Xede horrek ez du eragotziko klubak berak, edo erakunde instrumentalen bidez, jarduera ekonomikoak egitea, baldin eta jarduera horiek klubaren helburuekin zerikusia badute edo helburu horien zerbitzura badaude.

2. artikulua. Kirol-kluba, bere eraketari, inskripzioari, aldaketari, iraungitzeari, antolaketari eta funtzionamenduari dagozkion gai guztietan, honako hauen arabera arautuko da: Euskadiko jarduera fisikoaren eta kirolaren martxoaren 30eko 2/2023 Legea; kirol-klubei eta kirol-taldeei buruzko ekainaren 22ko 163/2010 Dekretua; Estatutu hauek eta aplikatu beharreko gainerako erregelamenduak; eta bere batzar nagusiak eta gainerako gobernu-organoek baliozkotasunez hartutako erabakiak. Xedapen horietan aurreikusten ez den orotan, kluba elkarteei buruzko araudi orokorraren arabera ere arautuko da.

3. artikulua. Kirol-klubari aplikatuko zaizkio, hala badagokio, atxikita dagoen kirol-federazioen xedapenak, atxikipen horren ondorioz bidezkoa den neurrian.

4. artikulua. Kirol-klubak Euskal Autonomia Erkidegoan garatuko du nagusiki bere jarduera. Era berean, egoitza soziala ERRENTERIA herrian finkatzen du, P.K. 20100, ZAMALBIDE KALEA 6, C LOKALA. Udalerri beraren barruan egoitza lekuz aldatzea administrazio-organoak erabaki ahal izango du, eta Euskadiko Kirol Erakundeen Erregistroari jakinarazi beharko dio.

II. KapituluaBazkideak

5. artikulua. Kirol-klubaren bazkide guztiak berdinak dira eskubide eta betebeharretan, eta ezin izango da jaiotza, arraza, sexu, erlijio, iritzi edo beste edozein egoera edo inguruabar pertsonal edo sozialengatik bereizkeria dakarren edo eragiten duen xedapenik egon.

6. artikulua. Kirol-klubeko kide izan ahal izango dira baldintza hauek betetzen dituzten pertsonak:

• a) Adinez nagusiak izatea.
• b) Dagokion sarrera-kuota ordaintzea.
• c) Kirol-klubaren helburuekiko interesa izatea.

7. artikulua. Kirol-klubean sartzeko eskaera presidenteari zuzendutako idazki bidez egingo da; presidenteak Zuzendaritza Batzordeari emango dio horren berri, eta Batzordeak erabakiko du aurreko artikuluan adierazitako baldintzak betetzen diren ala ez, onarpena emanez edo ukatuz. Erabaki horren aurka ez da inolako errekurtsorik onartuko.

8. artikulua. Kirol-klubaren bazkideei honako eskubide hauek aitortuko zaizkie:

• a) Kirol-klubaren helburu espezifikoak lortzen parte hartzea, indarrean dagoen legerian eta estatutuetako xedapenetan ezarritakoaren arabera, eta helburu horiek betetzea eskatzea.
• b) Kirol-klubetik askatasunez bereiztea.
• c) Kirol-klubaren jardueren berri izatea eta haren dokumentazioa aztertzea.
• d) Kirol-klubaren barruan bere iritziak askatasunez adieraztea.
• e) Ordezkaritza- eta gobernu-organoetarako hautesle eta hautagai izatea, betiere adinez nagusia bada eta jarduteko gaitasun osoa badu.
• f) Bere aurkako diziplina-neurriak hartu aurretik entzuna izatea eta neurri horiek eragiten dituzten egitateen berri jasotzea; hala badagokio, zehapena ezartzen duen erabakiak arrazoitua izan beharko du.
• g) Kirol-klubaren organoen erabakiak, Legearen edo estatutuen aurkakotzat jotzen dituenean, aurkaratzea.

9. artikulua. Kirol-klubetako bazkideek honako betebehar hauek izango dituzte:

• a) Kirol-klubaren helburuak partekatzea eta helburu horiek lortzen laguntzea.
• b) Estatutuen arabera bazkide bakoitzari dagozkion kuotak, derramak eta bestelako ekarpenak ordaintzea.
• c) Kirol-klubaren organoek baliozkotasunez hartutako erabakiak onartzea eta betetzea.
• d) Estatutuetako eta erregelamenduetako xedapenetatik ondorioztatzen diren gainerako betebeharrak betetzea.

10. artikulua. Bazkide izaera galduko da:

• a) Norberaren borondatez.
• b) Heriotzagatik, edo pertsona juridikoen desegiteagatik (halakorik balego).
• c) Bazkide-kuotak ezarritako epean ez ordaintzeagatik, betiere atzerapenaren arrazoia Zuzendaritza Batzordearen gogobetetasunerako justifikatzen ez bada.
• d) Estatutuetatik edo Erregelamenduetatik eratorritako betebeharrak larriki ez betetzeagatiko zehapenez, edo Batzar Nagusiak edo Zuzendaritza Batzordeak baliozkotasunez hartutako erabakiak larriki ez betetzeagatiko zehapenez.

11. artikulua. Kirol-klubeko kideei zehapenak ezarri ahal izango zaizkie, aldez aurretik espedientea instruitu eta entzunaldia eman ondoren. Zehapen horiek eskubideak aldi baterako galtzetik kirol-klubetik behin betiko kanporatzera bitartekoak izan daitezke.

III. KapituluaDokumentu-araubidea

12. artikulua. Kirol-klubak gutxienez honako liburu hauek eramango ditu ordenan eta egunean:

• a) Bazkideen Erregistro Liburua.
• b) Bere kide anitzeko organoen Akta Liburuak.
• c) Kontabilitate Liburuak.
• d) Hala badagokio, Zor-tituluen edo ondare-zati alikuotaren Erregistro Liburua.

Aurreko liburuak eramateak ez ditu eragotziko beste edozein xedapen orokorretatik ondorioztatzen diren dokumentu-betebeharrak.

Liburu horiek legeztatzea Euskadiko Kirol Erakundeen Erregistroan egingo da, hura arautzen duen araudiaren arabera.

13. artikulua. Bazkideen Erregistro Liburuan bazkideen izena, abizenak eta helbidea jaso beharko dira. Alta- eta baja-datak ere zehaztuko dira.

14. artikulua. Akta Liburuetan jasoko dira bai Batzar Nagusiak bai Zuzendaritza Batzordeak egiten dituzten bilerak, data, bertaratuak, landutako gaiak eta hartutako erabakiak adieraziz, eta kirol-klubaren lehendakaritza eta idazkaritza dituztenek sinatu beharko dituzte.

15. artikulua. Kontabilitate Liburuetan agertuko dira indarrean dauden kontabilitate-xedapenek eskatzen dituzten datu eta mugimenduak, klubaren ondarearen, emaitzaren eta finantza-egoeraren irudi zehatza lortzea ahalbidetzen dutenak, bai eta ondasunen inbentarioa ere.

IV. KapituluaOrdezkaritza-, gobernu- eta administrazio-organoak

16. artikulua. Hauek dira kirol-klubaren organoak:

• a) Batzar Nagusia
• b) Zuzendaritza Batzordea
• c) Lehendakaritza

I. Atala · Batzar Nagusia

17. artikulua. Batzar Nagusia gobernu-organo gorena da, eta boto-eskubidea duten bazkide guztiek osatzen dute.

18. artikulua. Batzar Nagusiari, gutxienez, honako eginkizun hauek egokituko zaizkio:

• a) Presidentea eta, hala badagokio, Zuzendaritza Batzordea hautatzea, sufragio pertsonal, aske, zuzen eta sekretu bidez.
• b) Kontuak eta aurrekontuak onartzea.
• c) Erregelamenduak onartzea.
• d) Estatutuak aldatzea.
• e) Kirol-klubaren bat-egitea, zatitzea, eraldatzea edo desegitea onartzea.
• f) Diru-maileguak hartzea.
• g) Higiezinak besterentzea eta kargatzea.
• h) Zorra edo ondare-zati alikuota adierazten duten titulu eskualdagarriak jaulkitzea.
• i) Presidentearen eta, hala badagokio, Zuzendaritza Batzordearen aurkako zentsura-mozioa onartzea.
• j) Administrazio-organoko kideen ordainsariaren baldintzak eta nolakoak onartzea.

19. artikulua. Batzar Nagusia ohiko bilkuran bilduko da kontuak eta, nahitaezkoa bada, aurrekontua onartzeko; eta ezohiko bilkuran, bere eskumeneko gainerako gaiak, sor litezkeenak, lantzeko.

20. artikulua. Kirol-klubaren lehendakaritzari dagokio ohiko Batzar Nagusirako deialdia egitea. Hori ezinezkoa bada, edo lehendakaritzak epean deitzeko betebeharra betetzen ez badu, Zuzendaritza Batzordeak edo boto-eskubidea duten bazkideen guztizkoaren % 10 gutxienez ordezkatzen duen edozein bazkide-taldek egin ahal izango du deialdia.

Kirol-klubaren lehendakaritzari edo boto-eskubidea duten bazkideen guztizkoaren % 10 gutxienez ordezkatzen duen edozein bazkide-talderi dagokio ezohiko Batzar Nagusirako deialdia egitea.

21. artikulua. Batzar Nagusiaren deialdia, ohikoa zein ezohikoa, landu beharreko gaien gai-zerrendarekin eta haiei buruzko dokumentazioarekin batera, bazkideei jakinaraziko zaie, hala badagokio, kirol-klubaren webgune ofizialean jarritako iragarki bidez, gutxienez 15 eguneko aurrerapenarekin, salbu eta epe hertsiek edo ustekabean sortutako ezohiko inguruabar larriek eragindako premiazko kasuetan. Webgunerik ez badago, posta bidezko edo bide elektronikoko komunikazioz egin beharko da.

22. artikulua. Batzar Nagusia, ohikoa zein ezohikoa, baliozkotasunez eratuta geratuko da lehen deialdian bere kideen % 50 gutxienez bertaratzen direnean. Bigarren deialdian, baliozkoa izango da bertaratutako kideen kopurua edozein dela ere. Bigarren deialdian, bilera ezin izango da egin aurrekoaz geroztik hogeita hamar minutu igaro baino lehen.

II. Atala · Zuzendaritza Batzordea

23. artikulua. Zuzendaritza Batzordea kirol-klubaren administrazio-organoa da. Kide kopuru bakoitiak osatuko du, ZAZPI kidek hain zuzen. Zuzendaritza Batzordeko kide izango dira kargu hauek: Lehendakaritza, kirol-klubarena ere izango dena, Lehendakariordetza, Idazkaritza (batzordekidea), Diruzaintza (batzordekidea), Zuzendari Teknikoa (batzordekidea), Ekitaldien Zuzendaria (batzordekidea), Komunikazio Zuzendaria (batzordekidea)

24. artikulua. Zuzendaritza Batzordeari kudeaketa administratibo eta ekonomikoari dagozkion eginkizunak egokituko zaizkio, eta Batzar Nagusitik datozen jarraibideen arabera garatu beharko ditu. Bere eginkizun guztiak edo batzuk bere barruan izendatutako batzorde betearazle batean edo bere kideetako batengan eskuordetu ahal izango ditu.

25. artikulua. Kirol-klubaren presidenteari edo, halakorik ezean, presidenteordeari dagokio Zuzendaritza Batzordearen bilkuretarako deialdia egitea. Deialdia, landu beharreko gaien Gai-zerrendarekin eta haiei buruzko dokumentazioarekin batera, Zuzendaritza Batzordeko kideei jakinaraziko zaie kirol-klubaren webgunearen bidez, gutxienez bi eguneko aurrerapenarekin, salbu eta epe hertsiek edo ustekabean sortutako ezohiko inguruabar larriek eragindako premiazko kasuetan. Webgunerik ez badago, posta bidezko edo bide elektronikoko komunikazioz egin beharko da.

26. artikulua. Zuzendaritza Batzordea baliozkotasunez eratuta geratuko da lehen deialdian bere kideen erdiak gehi batek parte hartzen dutenean, eta bigarren deialdian gutxienez bere kideetako bik eta, nolanahi ere, presidenteak edo presidenteordeak parte hartzen dutenean.

Era berean, Zuzendaritza Batzordea baliozkotasunez eratutzat joko da, aldez aurreko deialdirik egon ez arren, bere kide guztiak bertaratzen badira eta hala erabakitzen badute aho batez.

27. artikulua. Zuzendaritza Batzordearen bilkurak kirol-klubaren lehendakaritza duenak edo, halakorik ezean, lehendakariordetza duenak zuzenduko ditu, eta hark koordinatuko du Batzordearen jarduna.

28. artikulua. Idazkariak sartzeko eskaerak jaso eta izapidetuko ditu, kirol-klubaren organoek egiten dituzten bileren akta jasoko du, bazkideen fitxategia eta erregistro liburua eramango ditu, eta erakundearen webgunea eta erakundearen administrazio-lanen zuzendaritza izango ditu bere ardurapean. Eginkizun horiek betetzeko, langileen edo laguntzaileen laguntza izan ahal izango du.

29. artikulua. Zuzendaritza Batzordea, bai eta bere kideak banaka ere, arrazoi hauetakoren batengatik kargutik kenduko dira:

• a) Dimisioagatik.
• b) Heriotzagatik edo, hala badagokio, pertsona juridikoaren desegiteagatik.
• c) Zentsura-mozioa onartzeagatik.

Banakako kargu-uzteek Zuzendaritza Batzordearen kargu-uztea eragin dezaten, gutxienez bere kideen erdiei eragin beharko diete.

Zuzendaritza Batzordeak kargua uzten duenean, Kudeaketa Batzorde gisa eratuko da, eta gehienez hilabeteko epean Ezohiko Batzar Nagusirako deialdia egingo du Zuzendaritza Batzordea hautatzeko. Hori ezinezkoa bada, boto-eskubidea duten bazkideen guztizkoaren % 5 gutxienez ordezkatzen duen edozein bazkide-taldek egin ahal izango du Batzar Nagusi horretarako deialdia.

Zuzendaritza Batzordeko kide batek edo gehiagok banaka kargua uzten badute, baina bere osagaien % 50 baino gehiago geratzen badira, hutsik geratutako postuak kooptazio-sistemaren bidez beteko dira; hau da, Zuzendaritza Batzordeko kideek askatasunez izendatuko dituzte hutsik geratutako postuak betetzeko pertsonak. Kooptazio bidez izendatzen diren kideak egiten den lehen Batzar Nagusian berretsi beharko dira.

III. Atala · Lehendakaritza

30. artikulua. Presidentea kirol-klubaren organo betearazlea da, haren legezko ordezkaritza du, gobernu- eta administrazio-organoak zuzentzen ditu, eta organo horiek baliozkotasunez hartutako erabakiak betearazteko betebeharra du.

31. artikulua. Lehendakaritza Zuzendaritza Batzordeko gainerako kideekin batera izendatuko da, zerrenda itxiz osatutako hautagaitzen sistemaren bidez, eta hautagaitzan lehen tokian agertzen dena izango da presidente.

32. artikulua. Lehendakaritza duenak estatutu hauen 29. ARTIKULUAN aurreikusitako arrazoiren batengatik utziko du kargua. Kirol-klubaren lehendakaritza hutsik geratuz gero, aipatutako arauan aurreikusitako moduan jardungo da.

IV. Atala · Xedapen komunak

33. artikulua. Kirol-klubaren Zuzendaritza Batzordea eta presidentea lau urtean behin hautatuko dira, sufragio aske, pertsonal, zuzen eta sekretu bidez, eta bazkide guztiek parte hartu ahal izango dute. Hautaketa ezin izango da botoa eskuordetuz egin.

Kirol-klubaren organoetako kideek jardunean jarraituko dute ondorengoek kargua hartu arte, ezintasun nabarmena dagoenean izan ezik.

Zuzendaritza Batzordeko kideek beren karguaren araberako ordainsariak jaso ahal izango dituzte, betiere Batzar Nagusiak berariaz onartzen badu, gai-zerrendako beste puntuetatik bereizita eta bertaratutako kideen bi herenen gehiengoz.

34. artikulua. Batzar Nagusiak Zuzendaritza Batzorde osoaren edo bere kide baten edo batzuen erantzukizuna eskatu ahal izango du, horretarako deitutako bilkuran bertaratutako bazkideen bi herenek babestu beharko duten zentsura-mozioa onartuz.

Zentsura-mozioa bazkideen guztizkoaren % 10ek aurkeztuko diote idatziz Zuzendaritza Batzordeari. Ezohiko Batzar Nagusirako deialdiak gai-zerrendako puntu bakarra izango du: zentsura-mozioari buruzko eztabaida eta ebazpena.

Zuzendaritza Batzorde osoaren aurkako zentsura-mozioa onartzeak Zuzendaritza Batzordeko kideen kargu-uztea eragingo du, kirol-klubaren presidentea barne. Zentsura-mozioa bere kide bati edo batzuei zuzenduta badago, onartzeak Zuzendaritza Batzordeko kide horien kargu-uztea baino ez du ekarriko.

Zentsura-mozioak presidente berria eta, hala badagokio, Zuzendaritza Batzordea eta bere kide bat edo batzuk hautatzeko proposamena jaso ahal izango du. Hautatutako kargu berrien agintaldia aurreko agintaldia osatu arte izango da.

35. artikulua. Inola ere ezin izango da aldi berean kirol-klub bateko eta klub hori atxikita dagoen kirol-federazio bateko presidente izan.

Pertsona bera ezin izango da inola ere kirol-modalitate eta kategoria bereko zenbait kirol-klubetako presidente izan.

V. KapituluaHauteskunde-prozesua

36. artikulua. Klubaren hauteskunde-prozesua ekainaren 22ko 163/2010 Dekretuan, estatutu hauetan eta, hala badagokio, Batzar Nagusiak onartzen dituen hauteskunde-arauetan xedatutakora egokituko da.

Klubari ez zaio aplikatuko ekainaren 22ko 163/2010 Dekretuaren 47. artikuluan Hauteskunde Batzordea izateari buruz aurreikusitako araubidea. Hautagaitzak aurkeztea eta bozketa dagokion hautaketarako deitutako Batzar Nagusiaren beraren barruan egingo dira.

37. artikulua. Administrazio-organoetarako aurkezten diren hautagaitzek emakumeen eta gizonen presentzia orekatua islatu beharko dute, arrazoi objektiboengatik ezinezkoa denean izan ezik.

Hautagaitza bakarra badago, hura aldarrikatuko da, inolako bozketaren beharrik gabe.

VI. KapituluaAraubide ekonomikoa

38. artikulua. Kluba aurrekontu- eta ondare propioaren araubidera lotzen da. Ekitaldi ekonomikoa urtekoa izango da, eta urte bakoitzeko abenduaren 31n itxiko da.

Klubak ez du ondare fundaziozkorik, eta bere jarduerak garatzeko baliabideak honako hauek izango dira:

• a) Sarrera-kuotak eta/edo aldizkako kuotak, hala badagokio, Batzar Nagusiak erabakitzen dituenak.
• b) Dagozkion ondasun eta eskubideen etekinak, bai eta jaso ditzakeen dirulaguntzak, legatuak, dohaintzak eta babesletzak ere.
• c) Klubak egitea erabakitzen dituen jarduera zilegien bidez sor ditzakeen beste edozein diru-sarrera, betiere klubaren estatutuetako helburuen barruan.

Diru-sarrera guztiak, kirol-ekitaldietan lortutako mozkinak barne, osorik bideratuko dira xede soziala garatzera. Inola ere ezin izango dira mozkinak banatu bazkideen artean, ezta haien ezkontideen edo antzeko afektibitate-harremanarekin haiekin bizi diren pertsonen artean, ezta haien senideen artean ere, eta ezin izango zaizkie dohainik laga irabazi-asmoa duten pertsona fisiko edo juridikoei.

Ondasun higiezinak xedatzeko, besterentzeko edo kargatzeko, Batzar Nagusiaren erabakia beharko da, bertaratutako bazkideen bi herenen gehiengoz hartua.

39. artikulua. Kirol-kluba desegiten bada, edo bazkide bat bereizten bada, hark hasierako ondare-partaidetza edo egindako beste ekarpen ekonomiko batzuk jaso ahal izango ditu, elkartekide izateagatik ordaindutako kuotak barne hartu gabe. Hori posible dela ulertzen da, betiere ondarearen murrizketak hirugarren pertsonei edo erakundeei kalterik eragiten ez badie. Bereizketa-kasuetan ondare-partaidetza jasotzeko ezaugarriek ez dute klubaren irabazi-asmorik gabeko izaera desitxuratu behar. Batzar Nagusiari dagokio artikulu honetan aurreikusitako erabakiak hartzea.

VII. KapituluaEstatutuen aldaketa

40. artikulua. Estatutu hauek horretarako deitutako Ezohiko Batzar Nagusian soilik aldatu edo indargabetu ahal izango dira, bertaratutako bazkideen bi herenen gehiengo kualifikatuz hartutako erabakiaren bidez.

VIII. KapituluaDesegitea eta likidazioa

41. artikulua. Kluba Batzar Nagusiaren erabakiz desegingo da, estatutu hauek aldatzeko ezarritako betekizunekin eta gehiengoarekin hartua, edo erabaki judizialez.

42. artikulua. Kirol-kluba desegiteak likidazio-aldia irekitzen du, eta aldi hori amaitu arte erakundeak bere nortasun juridikoa gordeko du.

Administrazio-organoko kideak likidatzaile bihurtuko dira, Batzar Nagusiak edo, hala badagokio, desegitea erabakitzen duen epaileak izendatzen ez baditu behintzat, eta 163/2010 Dekretuaren 69.3 artikuluan ezarritako eginkizunak beteko dituzte.

Likidazio-aldian, kirol-klubak bere izenari "likidazioan" esapidea gehitu beharko dio

43. artikulua. Kirol-kluba desegin eta likidatzen bada, likidaziotik ateratzen den ondare garbia kirola sustatzeko eta praktikatzeko erabiliko da, udalerri bereko edo, hala badagokio, Lurralde Historiko bereko kirol-erakunde baten bidez.

IX. KapituluaDiziplina-araubidea

44. artikulua. Kirol-klubak bere kideen gainean duen diziplina-ahala bere arauen bidez arautuko da, eta ez da izango ondoren kirol-federazioen eta Kirol Justiziako Euskal Batzordearen aurrean errekurtsoa jartzeko modukoa. Kirol-klubak diziplina-arloan hartutako erabakiak jurisdikzio arruntaren aurrean aurkaratu ahal izango dira.

Errenterian onartuak 2025eko abenduaren 15ean, eta Euskadiko Kirol Erakundeen Erregistroan inskribatuak 2025eko abenduaren 16an.

Itxi Estatutuak